له پاکستان او ايران نه نږدې درې زره افغان کډوالې کورنۍ بېاختيارې شړل شوي
د کډوالو د جبري ستنېدو د لړۍ په دوام کې، د طالبانو اداره وايي چې د دوشنبې په ورځ (د لړم دولسمه) ټولټال ۲،۹۶۳ افغان کډوالې کورنۍ له ګاونډیو هېوادونو څخه هېواد ته بېرته راستانه شوې دي.
د ورکړل شويو شمېرو له مخې، ۱،۰۰۴ کورنۍ د سپین بولدک له لارې، ۱،۷۰۰ کورنۍ د تورخم له پولي، او ۱۵۵ کورنۍ د بهرامچې له لارې افغانستان ته راستانه شوې دي. دغه درې واړه لارۍ اصلاً د افغانستان او پاکستان ترمنځ سرحدونه دي.
له ايران نه هم ۳۳ افغان کورنۍ د پل ابریشم له لوري او ۷۷ کورنۍ د اسلامقلعه له لارې هېواد ته بېرته راستنې شوې دي. دا ستنېدنه پر داسې مهال ترسره کېږي چې د ايران او پاکستان د حکومتونو له خوا فشارونه ورځ تر بلې ډېرېږي، او دا کار د بشري حقونو نړېوال سازمانونه اندېښمن کړي دي.
طالبان دا شمېرنه پر داسې وخت خپروي چې تر دې دمه یې د دغو کورنيو لپاره د استوګنې يا ملاتړ هيڅ روښانه او دوامدار پلان نه دی اعلان کړی. ګڼ شمېر شنونکي د دغو راستنېدونکو کورنيو د بشري حالت په اړه اندېښنه لري، ځکه ډېرې له دې کورنيو سره د لومړنيو اسانتياوو سخت کمښت دی.
د افغان کډوالو جبري ستنول، له ګاونډيو هېوادونو څخه، چې د بنسټیز ملاتړ او د دايمي معيشت د فرصتونو له شتون پرته ترسره کېږي، د هېواد بشري بحران لا ژور کړی دی. تمه کېږي چې د طالبانو اداره به په دې برخه کې مسووليت واخلي او د راستنېدونکو کورنيو له لا زيات کړاو څخه مخنيوی وکړي.
